Jan 4 • 13M

സാമൂഹിക ഓർമ്മയുടെ ചലച്ചിത്ര സ്മാരകം: കുറുപ്പ്

"I'm gonna make him an offer he can't refuse" (The Godfather,1972)

7
21
 
1.0×
0:00
-13:07
Open in playerListen on);
History For Everyone
Episode details
21 comments

ഴിഞ്ഞ കാല ചരിത്ര സംഭവങ്ങളോ, ചരിത്ര വ്യക്തികളോ, മററു ചരിത്രാഖ്യാനങ്ങളോ സിനിമയ്ക്കാധാരമാകുമ്പോഴാണ് സാധാരണ ചരിത്ര സിനിമ ഉണ്ടാകുന്നത്. പഴയ കാല മലയാള ചിത്രങ്ങളായ മാർത്താണ്ഡവർമ്മ, വേലുത്തമ്പി ദളവ, എൺപതുകളുടെ അവസാനത്തിലെ വടക്കൻ വീരഗാഥയും, ഈ നൂറ്റാണ്ടിലെ കേരളവർമ്മ പഴശ്ശിരാജയും, കായംകുളം കൊച്ചുണ്ണിയും, കുഞ്ഞാലി മരയ്ക്കാറുമൊക്കെയാണ് ആദ്യ ചിന്തയിൽ ഈ വിഭാഗത്തിലേക്ക് ഓടിയെത്തുന്ന മലയാള ചലച്ചിത്രങ്ങൾ. കേരള ചരിത്രവുമായി അഭേദ്യമായ ബന്ധവും ഗവേഷണ പഠനങ്ങളുടെ പെരുമഴയും കണ്ട ചരിത്ര വിഷയങ്ങളാണിവയൊക്കെയെന്നതിൽ തർക്കമില്ല. ഈ ഗണത്തിലേക്ക് നവംബർ 2021 ൽ പുറത്തിറങ്ങിയ കുറുപ്പ് എന്ന മലയാള ചിത്രത്തെ ഉൾപ്പെടുത്തുവാൻ സാധിക്കുമോ എന്ന ചോദ്യം, ചിലപ്പോൾ ചിലരെ അമ്പരപ്പിച്ചേക്കാം. 1984 ൽ കേരളത്തിൽ നടന്ന ഒരു കൊലപാതകത്തിനും അതിനു ശേഷമുള്ള കുറ്റവാളിയുടെ തിരോധാനത്തിനും കേരള ചരിത്രത്തിൽ എന്തു പ്രസക്തിയെന്നതാവണം ബൃഹത്ത് ചരിത്രാഖ്യാനങ്ങൾ ഇഷ്ടപ്പെടുന്നവരുടെ സാധാരണ ചിന്ത. 1980 കളിലെ കേരളത്തിൻ്റെ സാമൂഹിക സാമ്പത്തിക വ്യതിയാനങ്ങൾ, ഗൾഫ് കുടിയേറ്റവും തുടർന്നുണ്ടായ സാംസ്കാരിക / സാമ്പത്തിക മാറ്റങ്ങൾ, ഒരു ശരാശരി മലയാളിയുടെ സ്വപ്നങ്ങളും, മനോഭാവവും, ധനമോഹവും മാറുന്ന കുറ്റവാസനകളും ഒരു ചരിത്ര ഗ്രന്ഥത്തിനു കഴിയാത്ത വിധം തെളിമ നൽകുന്ന ചലച്ചിത്രമാണ് കുറുപ്പ്. ഇതിനെല്ലാം പുറമേ ദൈനംദിന ജീവിതത്തിൻ്റെ ചരിത്രവും( history of every day life) ആകസ്മികതയുടെ ചരിത്രവുമാണ് കുറുപ്പ് വരച്ചുകാട്ടുന്നത്. വീട്ടിൽ നിന്നു ജോലിക്കു പോയ ചെറുപ്പക്കാരൻ ഒരിക്കലും വീട്ടിലേക്കു മടങ്ങി വരാത്ത സ്ഥിതിയിലായ 'കെണി'യുടെ ചരിത്രം കൂടിയാണ് കുറുപ്പ്. ചാക്കോയുടെ ജീവിതത്തിലെ സിനിമാറ്റിക് ആകസ്മികത തന്നെയായിരുന്നു 'കെണി' എന്ന ചലച്ചിത്രത്തിൻ്റെ കണക്കെടുപ്പിനു ശേഷം യഥാർത്ഥ 'കെണി' യിലേക്ക് കൈകാണിച്ചു കയറിപ്പോയപ്പോൾ സംഭവിച്ചതും. ഒരർത്ഥത്തിൽ കുറുപ്പ് സിനിമ, കെണി / കെണികളുടെ ചരിത്ര ലോകത്തെയാണ് കാട്ടിത്തരുന്നത്.

1980 കളിലെ കേരളത്തിൻ്റെ സാമൂഹിക സാമ്പത്തിക വ്യതിയാനങ്ങൾ, ഗൾഫ് കുടിയേറ്റവും തുടർന്നുണ്ടായ സാംസ്കാരിക / സാമ്പത്തിക മാറ്റങ്ങൾ, ഒരു ശരാശരി മലയാളിയുടെ സ്വപ്നങ്ങളും, മനോഭാവവും, ധനമോഹവും മാറുന്ന കുറ്റവാസനകളും ഒരു ചരിത്ര ഗ്രന്ഥത്തിനു കഴിയാത്ത വിധം തെളിമ നൽകുന്ന ചലച്ചിത്രമാണ് കുറുപ്പ്.

സാമൂഹിക ഓർമ്മയും ചരിത്രവുമായി അഭേദ്യമായ ഒരു പൊക്കിൾക്കൊടി ബന്ധമുണ്ട്. 1984 ൽ നടന്ന ഒരു കൊലപാതകവും അത് ആസൂത്രണം ചെയ്ത കുറ്റവാളിയുടെ തിരോധാനവും കേരളത്തിൻ്റെ സാമൂഹിക ചരിത്രത്തിലെ കൂട്ടായ ഓർമ്മയുടെ (collective consciousness) ഭാഗമായി മാറിയെങ്കിലും, ഒരു നിഷ്കളങ്കൻ്റെ വധത്തിലും എത്രയോ വലുതായ സ്മാരക ഓർമ്മയായി മാറി കുറ്റവാളിയുടെ ചരിത്ര തിരോധാനം. ഒരു ഇതിഹാസകാവ്യമോ, മിത്തോ ഒക്കെയായി മാറി സുകുമാരക്കുറുപ്പിൻ്റെ തിരോധാനം (മാഞ്ഞു പോകൽ എന്നു വിളിക്കാനാണ് ഞാൻ കൂടുതൽ ഇഷ്ടപ്പെടുന്നത് ). 1984 മുതൽ കുറുപ്പു സിനിമ റിലീസ് ചെയ്തതു വരെ ഈ മാഞ്ഞു പോകൽ മലയാളിയുടെ ഓർമ്മിച്ചെടുക്കലിലെ സ്മാരകവൽക്കരിക്കപ്പെട്ട ശിലാബോധം പോലെ ആയിത്തീർന്നു, അതിൻ്റെ തീവ്രത ക്രമേണ കുറഞ്ഞു വന്നെങ്കിലും. കുറുപ്പിനെ പിടികിട്ടിയോ സാർ എന്നു പോലീസുകാരോടു കളിയാക്കി ചോദിക്കുന്നതിലും ( ഒരു വെല്ലുവിളിയായും), ഭക്ഷണം കഴിക്കാത്ത കൊച്ചു കുഞ്ഞിനോട് കുറുപ്പ് വരുമെന്നു പറഞ്ഞു ഭയപ്പെടുത്തുന്നതിലും, നായികക്ക് തന്നോട് പ്രണയം തോന്നാൻ കുറുപ്പിനെ പിടിക്കാൻ ഹൂബ്ലിയിലേക്ക് പോകുന്നുവെന്നു പറയുന്ന സിനിമാറ്റിക് ഭാവനയിലും, കുറുപ്പിൻ്റെ രൂപവുമായി സാമ്യമുള്ളവരെ വേട്ടയാടുന്നതിലുമൊക്കെ സുകുമാര കുറുപ്പെന്ന പിടികിട്ടാപ്പുള്ളി ( the fugitive villain) മിത്തു വൽക്കരിക്കപ്പെടുകയായിരുന്നു. സുകുമാരക്കുറുപ്പെന്നു പേരുള്ളവർ ആ കാലയളവിൽ തങ്ങളുടെ പേരു പറയാൻ പോലും ഭയന്നിരിക്കണം. മറ്റൊരർത്ഥത്തിൽ സുകുമാരകുറുപ്പ് ഇതിലൂടെയെല്ലാം ചരിത്രവൽക്കരിക്കപ്പെടുകയും, മറ്റു ജനങ്ങൾക്കൊപ്പം കേരളത്തിൻ്റെ ഓർമ്മ ചരിത്രബോധത്തിലെ സുപ്രധാന റഫറൻസ് പോയിൻ്റായി മാറുകയും ചെയ്തു. ഈ റഫറൻസ് പോയിൻ്റിൽ നിന്നും ഉയർന്നു വന്ന സിനിമാ ആശയം തന്നെയാണ് കുറുപ്പ് എന്ന ചലച്ചിത്രവും അതിൻ്റെ ചരിത്രപരതയും.

ഒരു ചരിത്ര സിനിമയെന്ന് അവകാശവാദമുന്നയിക്കുന്നില്ലെങ്കിലും, കുറുപ്പിൻ്റെ തുടക്കം മുതൽ ഒടുക്കം വരെ ഒരു ചരിത്രകാരൻ്റെ ഗവേഷണ രീതിശാസ്ത്രത്തിൻ്റെ സിനിമാറ്റിക് പരിവർത്തനമാണ് പ്രയോഗത്തിൽ കാണുന്നത്. ചരിത്രബോധത്തെയും, ആധാര രേഖകളെയും, ഓർമ്മകളെയും ഫുട്ട് നോട്ടുകളാക്കി മാറ്റാതെ ഷോട്ടുകളിലൂടെ കൃത്യമായി സിനിമ കാണിക്കുന്നത് ശാസ്ത്രീയ ചരിത്രരചനാരീതിക്കൊപ്പം നിൽക്കുവാനും, കൈകാര്യം ചെയ്യുന്ന വിഷയത്തിൻ്റെ ആധികാരികത ഉറപ്പിക്കാനുമാണ്. സർവ്വീസിൽ നിന്നും വിരമിക്കുന്ന പോലീസ് ഉദ്യോഗസ്ഥൻ്റെ ഷെൽഫിൽ നിന്നും ആകസ്മികമായി കീഴുദ്യോഗസ്ഥൻ കണ്ടെടുക്കുന്ന 1984 എന്നെഴുതിയ ഫയൽകൂട്ടവും അതിലെ ഡയറിയുമാണ് സിനിമയുടെ തുടക്കത്തിൽത്തന്നെ പ്രേക്ഷകൻ കണ്ടുമുട്ടുന്നത്. ഏകദേശം 40 വർഷം പഴക്കമുള്ള ഡയറി പുരാരേഖാ വകുപ്പിൽ നിന്നും കിട്ടുന്ന സമാന കാലരേഖകകളുടെ തവിട്ടു നിറം വന്നു തുടങ്ങിയ രേഖ പോലെ തന്നെയാണ് കാണിച്ചിരിക്കുന്നത്. ഈ രേഖയിലൂടെ പോകുന്ന ക്യാമറക്കണ്ണുകൾ സുകുമാരക്കുറുപ്പിൻ്റെ ജീവിതവും കുറ്റകൃത്യവും തുടർ സംഭവങ്ങളും നേർരേഖീയമായ ആഖ്യാനരീതിയിൽത്തന്നെയാണ് ദൃശ്യവൽക്കരിച്ചിരിക്കുന്നത്. ഒരു കുറ്റകൃത്യത്തിലേക്കും തിരോധാനത്തിലേക്കും നയിച്ച സംഭവപരമ്പരകളെ, ഏതൊരു വിഭാഗത്തിൽപ്പെട്ട പ്രേക്ഷകനും പെട്ടന്നു മനസ്സിലാക്കുവാൻ സാധിക്കുന്ന രീതിയിലായിരിക്കണം സിനിമയുടെ കഥ പറച്ചിൽ മുൻപോട്ടു പോകേണ്ടത്. ഒരു ചരിത്രകാരൻ്റെ ചടുലതയോടെ സുകുമാരക്കുറുപ്പിൻ്റെ വീക്ഷണത്തിലും പോലീസിൻ്റെ വീക്ഷണത്തിലും സിനിമ ദൃശ്യവൽക്കരണം നടത്തിയതിനു പിന്നിൽ, കുറുപ്പെന്ന കുറ്റവാളിയെ അടയാളപ്പെടുത്തുന്ന എഴുതപ്പെട്ടതും, സമൂഹത്തിൻ്റെ എല്ലാ തട്ടിലും പ്രസരണം ചെയ്യപ്പെട്ട കുറുപ്പോർമ്മയുടെ പിൻബലമാണ് കാണുന്നത്. കഴിഞ്ഞകാലത്ത് നടന്ന ഒരു സംഭവം ഏതു രീതിയിൽ ചരിത്രമാകണമെന്നു തീരുമാനിക്കുന്നത്, അത് സംഭവിച്ച കാലത്തെ വർത്തമാന രാഷ്ട്രീയവും അതു വീണ്ടെടുക്കുന്ന വർത്തമാനകാലത്തെ രാഷ്ട്രീയവുമാണ്. അവിടെയാണ് കുറുപ്പിൻ്റെ ചരിത്രം പ്രബലവും ഒരു തരത്തിൽ ജനപ്രിയവുമായി മാറുന്നതും ചാക്കോയുടെ ചരിത്രം ഉപകഥയോ, പിടികിട്ടാപുളളിയുടെ ചരിത്രത്തിൻ്റെ അനുബന്ധമോ ഒക്കെയായി മാറുന്നതും.

ഒരു ചരിത്ര സിനിമയെന്ന് അവകാശവാദമുന്നയിക്കുന്നില്ലെങ്കിലും, കുറുപ്പിൻ്റെ തുടക്കം മുതൽ ഒടുക്കം വരെ ഒരു ചരിത്രകാരൻ്റെ ഗവേഷണ രീതിശാസ്ത്രത്തിൻ്റെ സിനിമാറ്റിക് പരിവർത്തനമാണ് പ്രയോഗത്തിൽ കാണുന്നത്.

മലയാളിയുടെ ഗൾഫ് മോഹത്തിൻ്റെയും സ്വപ്നങ്ങളുടെയും സുവർണ്ണ കാലഘട്ടത്തിലാണ് (Gulf Boom)കുറുപ്പും ഗൾഫിലെത്തുന്നത്. ഇതൊരു സാമൂഹിക-സാമ്പത്തിക ഘടനാ മാറ്റത്തിനു വഴിതെളിച്ചെങ്കിലും, വ്യക്തിപരമായി ഇതിൽ വിജയിച്ചവരും, പരാജിതരും ഉണ്ട്. കേരളത്തിൽ 70 കളിലും 80 ൻ്റെ തുടക്കത്തിലും ഗൾഫിലേക്കു കടക്കാനുള്ള വ്യാജ NOC തരപ്പെടുത്തി കൊടുക്കുന്ന , വലിയ പലിശക്ക് പണം കൊടുക്കുന്ന സ്വകാര്യ പണമിടപാടു സ്ഥാപനങ്ങളുമുണ്ടായിരുന്നു. പേരു മാറ്റി കുറുപ്പു പാസ്പോർട്ട് സംഘടിപ്പിക്കുന്നതും ഈ സാഹചര്യത്തിലാണ്. ഒരു ശരാശരി മലയാളിയുടെ ജീവിത നിലവാരത്തെയും ദൈനംദിന ജീവിതത്തെയും അടിമുടി പൊളിച്ചെഴുതിയ കാലഘട്ടമായിരുന്നു 1970 ഉം 80 ൻ്റ തുടക്കവും. നേരം ഇരുണ്ടു വെളുക്കുമ്പോൾ ലക്ഷപ്രഭുക്കൾ ആയി മാറിക്കൊണ്ടിരുന്നവരുടെ ചരിത്രവും ഇതിനൊപ്പം കൂട്ടി വായിക്കേണ്ടതുണ്ട്. ഗൾഫിൻ്റെ മാസ്മരികത സൃഷ്ടിച്ച മുതലാളിത്ത സംസ്കാരത്തിൻ്റെ (Culture of Capitalism) പിടിയിലകപ്പെട്ട കുറുപ്പ് ദൂർത്തിൻ്റെയും ധാരാളിത്തത്തിൻ്റെയും മകുടോദാഹരണമായി മാറി. കേരളത്തിൻ്റെ കൊച്ചു സാമ്പത്തിക ലോകത്തു നിന്നും വന്ന കൂർമ്മ ബുദ്ധിക്കാരനും, കുറ്റവാസനയും ഉണ്ടായിരുന്ന കുറുപ്പ് വൻ ഇൻഷുറൻസ് തട്ടിപ്പിൻ്റെ കഥകൾ അറിയുകയും, സമാന രീതിയിലുള്ള ഒരു അപകട മരണം സൃഷ്ടിച്ച് ഏകദേശം മുപ്പതു ലക്ഷം തട്ടിയെടുക്കാനുള്ള ഗൂഢ പദ്ധതിക്ക് മനസ്സിൽ ബീജാപാവം നടത്തുകയും ചെയ്തു. വലിയ കച്ചവട ലോകത്തിൻ്റെ അഭിരമിപ്പിക്കുന്ന ലാഭ കഥകൾ തന്നെയാണ് സാധാരണക്കാരനായ മലയാളിയെക്കൊണ്ട് ഇതൊക്കെ ചെയ്യാൻ പ്രേരിപ്പിക്കുന്ന പ്രധാന ഘടകം. സിനിമയിൽ കുറുപ്പു പറയുന്നുണ്ട്, കണ്ണടച്ചു തുറക്കുന്നതിനു മുൻപ് വണ്ടാനത്തു നിന്നും കാശുണ്ടാക്കാമെന്ന്. മാവേലിക്കരയിലെ കുന്നം എന്ന പ്രദേശത്തു നടന്ന കൊലപാതകത്തിൻ്റെ വ്യവഹാര ഭൂമികയിലെ സുപ്രധാനമായ ഇടം തന്നെയാണ് ഗൾഫും അന്തർദേശീയ സാമ്പത്തിക തട്ടിപ്പിൻ്റെ കഥകളും. ഇവിടെത്തന്നെയാണല്ലോ ചാക്കോയുടെ കൊലപാതകത്തിൽ കലാശിക്കുന്നതും, ലോക ചരിത്രത്തിൽത്തന്നെ ശ്രദ്ധ നേടിയ തിരോധാനത്തിൻ്റെയും ചരിത്രം തുടങ്ങുന്നതും. ഗൾഫ് കുടിയേറ്റ ചരിത്രവും, വൻ സാമ്പത്തിക സ്വപ്നങ്ങളുടെ ആവിർഭാവവും കൂടി ഈ കൊലപാതക / തിരോധാന ചരിത്രത്തിനൊപ്പം കൂട്ടി വായിക്കേണ്ടതുണ്ട്. കുന്നത്തു നടന്ന അരും കൊലയുടെ പ്രഭവകേന്ദ്രം ഒരു കുററവാളിയുടെ തികച്ചും ആത്മകഥാപരമായ വേഷപ്പകർച്ചയായി കാണുന്നത് ചരിത്രത്തെ സാമാന്യവൽക്കരിക്കുന്നതിന് തുല്യമാണ്.

ഒരു പീരിയേഡ് ചലച്ചിത്രത്തിൻ്റെ സൂക്ഷ്മതലങ്ങളെ ശ്രദ്ധാപൂർവം ദൃശ്യവൽക്കരിക്കുവാൻ കുറുപ്പു സിനിമയ്ക്ക് സാധിച്ചു. വസ്ത്രാലങ്കാരത്തിലും, വാഹനങ്ങൾ, കെട്ടിടങ്ങൾ (തിരുവനന്തപുരം എയർപോർട്ടടക്കം) ലൊക്കേഷനുകളുടെ തെരഞ്ഞെടുപ്പിലുമെല്ലാം ചരിത്ര സിനിമയുടെ കൃത്യത കുറുപ്പ് നിലനിറുത്തി. കുറുപ്പ് മാവേലിക്കരയിൽ നിർമ്മിച്ചു കൊണ്ടിരുന്ന വീടിൻ്റെ ചിത്രം അതേപടി സിനിമയുടെ ടൈറ്റിലിൽ കാണിക്കുന്നുണ്ട്. സിനിമയുടെ ടൈറ്റിൽ കാണിക്കുന്ന സമയത്ത് പത്ര ക്ലിപ്പിങ്ങുകളും, കുറ്റകൃത്യം നടന്നതിൻ്റെ ചിത്രീകരണവും കൃത്യമായി കോർത്തിണക്കി ഒരു ചരിത്ര സിനിമയ്ക്ക് വേണ്ട നറേറ്റീവ് ഉണ്ടാക്കിയെടുത്തു. ഈ തിരോധാനത്തിൻ്റെയും നിഷ്ഠൂര വധത്തിൻ്റെയും സംഭവങ്ങളേയും വ്യക്തികളേയും കുറിച്ച് പൊതുമണ്ഡലത്തിലുള്ള രേഖകളും മറ്റ് റിപ്പോർട്ടുകളുമാണ് ഈ സിനിമയ്ക്ക് പ്രചോദനമായതെന്ന് ഡിസ്ക്ലേമറിൽ ചലച്ചിത്രത്തിൻ്റെ തുടക്കത്തിൽ കാണിക്കുന്നുണ്ട്. ഈ സിനിമ ഒരു ഡോക്യൂമെൻ്ററി അല്ലെന്നും യഥാർത്ഥ സംഭവങ്ങളുടെ സിനിമാറ്റിക് ഭാവനാവൽക്കരണത്തിലൂടെ 1984 ലെ കൊലയും കൊലയിലേക്കും തിരോധാന ചരിത്രത്തിലേക്കും നടന്ന സംഭവങ്ങളും ചിത്രീകരിച്ചിരിക്കുന്നതായും ഡിസ്ക്ളേമറിൽ സൂചിപ്പിച്ചിട്ടുണ്ട്. ഇത് ഒരു ചരിത്ര സിനിമ തന്നെയാണെന്ന് പ്രേക്ഷകരെ വിശ്വസിപ്പിക്കേണ്ടത് സിനിമയുടെ തുടർകാഴ്ചയെ സ്വാധീനിക്കുന്ന ഘടകമായതിനാലാണ് തുടക്കത്തിൽത്തന്നെ ഇതെല്ലാം വിശദീകരിക്കുന്നത്. ഇതിനെല്ലാം ഉപരിയായി കേരളാ പോലീസിൻ്റെയും ഫോറൻസിക് വിദഗ്ധരുടെയും നിരന്തര പരിശ്രമത്തേയും ബുദ്ധികൂർമ്മതയേയും കുറുപ്പ് മഹത്വവൽക്കരിക്കുക വഴി സർക്കാരിൻ്റെ നീതിന്യായ സംവിധാനത്തിലുള്ള വിശ്വാസം ഒന്നുകൂടി ഉറപ്പിക്കുകയും ചെയ്യുന്നു. സിനിമയിൽ കുറുപ്പിനെ കുടുക്കാൻ പറ്റാത്ത പോലീസിനൊപ്പം പ്രേക്ഷകരും നിരാശരാകുന്നത്, പോലീസ് / ഫോറൻസിക് വിദഗ്ധരോടുളള വിശ്വാസം കൊണ്ടു തന്നെയാണ്.

മലയാളിയുടെ മനസ്സിൽ ശിലാവൽക്കരിക്കപ്പെട്ട ഓർമ്മയെ പൊടി തട്ടിയെടുത്ത് പൊതുചർച്ചയിലേക്കും സംവാദങ്ങളിലേക്കും കൊണ്ടു വന്നിരിക്കുകയാണ് കുറുപ്പ്. ഈ ചരിത്ര സംഭവത്തേക്കുറിച്ച് അറിയാത്തവരായിരുന്ന പുതുതലമുറയ്ക്കും കുറുപ്പ് ഇതിഹാസം ഇപ്പോൾ സുപരിചിതമാണ്. അമ്മമാർ ഭക്ഷണം കഴിക്കാത്ത മക്കളെ പേടിപ്പിക്കുന്ന ഭൂതമായി കുറുപ്പു വീണ്ടും വന്നിരിക്കും. ഈ സിനിമ റിലീസ് ആകുന്നതിന് തൊട്ടുമുൻപും പിൻപും യൂ ട്യൂബിലും ചാനലുകളിലും കുറുപ്പ് നിറഞ്ഞാടുന്നു. ഇനിയങ്ങോട്ട് എഴുത്തുരൂപങ്ങളായും, ഡോക്യുമെൻ്ററികളായും ധാരളം പുതിയ ആധാര രേഖകൾ കുറുപ്പിൻ്റെ പുതിയ ചരിത്രം സൃഷ്ടിച്ചു കൊണ്ടേയിരിക്കും. കേരള ചരിത്ര ഗ്രന്ഥങ്ങളിലും സർവകലാശാല സിലബസ്സുകളിലും ചാക്കോ വധവും കുറുപ്പിൻ്റെ തിരോധാനവും പഠനവിഷയമായി വരാൻ സാധ്യത കുറവാണ്. കുറുപ്പ് എന്ന സിനിമ സർവകലാശാലകൾക്കും ചരിത്രകാരന്മാർക്കും സാധിക്കാത്തത് വീണ്ടെടുത്തിരിക്കുകയാണ്. പഴശ്ശിരാജ, മമ്മൂട്ടി പഴശ്ശിരാജ ആയതു പോലെ, സുകുമാരക്കുറുപ്പ് ,ദുൽഖർ കുറുപ്പിലൂടെ കേരളത്തിൻ്റെ അപൂർവ്വങ്ങളിൽ അപൂർവ്വമായ കുറുപ്പു ചരിത്രത്തിനു പുതിയ മാനങ്ങൾ നേടിയെടുക്കും, ചാക്കോയുടെ ചരിത്രം വീണ്ടും അനുബന്ധമായി തുടരും. NH 47 ൽ നിന്നു കുറുപ്പിലേക്കുള്ള ഓർമ്മച്ചരിത്ര ദൂരം തന്നെയാണ് കുറുപ്പിനെ ചരിത്ര സിനിമയാക്കി മാറ്റിയ ഭാവനാ പരിണാമത്തിൻ്റെ രഹസ്യം.

Dead end!

ചാക്കോയ്ക്ക് നിരസിക്കാൻ പറ്റാത്ത ഓഫറായിരുന്നു അത്, മരണത്തിലേക്ക് ചോദിച്ചു മേടിച്ച ഗോഡ്ഫാദറിൻ്റെ ഓഫർ!

Thanks for reading Historica! Subscribe for free to receive new posts and support my work.

A guest post by
Renowned historian and researcher, academic/public speaker, writer in contemporary magazines and news papers,teaches history at the department of history, UC College Aluva. Kerala State Film Special Jury Award winner for article on Malayalam films.
Subscribe to Dr