Jan 6 • 13M

കേരളവും മലയാളിയുടെ ചരിത്ര ജീവിതവും - എപ്പിസോഡ് 1

അരികുവൽകരിക്കപ്പെട്ടവരുടെ ഉൾക്കൊള്ളൽ ചരിത്രം (Inclusive History)

7
5
 
1.0×
0:00
-12:48
Open in playerListen on);
History For Everyone
Episode details
5 comments

ലയാള ഭാഷ സംസാരിക്കുന്ന ജനസമൂഹങ്ങളുടെ സാംസ്‌കാരിക സ്വത്വമുള്ള ഒരു ഭൂപ്രദേശമായി കേരളത്തെ ചരിത്ര ഭൂതകാലങ്ങളിൽ കണ്ടെടുക്കുന്ന എഴുത്തുരീതികളാണ് കേരള ചരിത്രമായി തീർന്നത്. പ്രാചീന കാലം മുതൽ കേരളത്തിന്റെ ചരിത്ര ജീവിതത്തെപ്പറ്റിയുള്ള വിവിധ ആവിഷ്‌കാരങ്ങൾ ഉണ്ടായി വന്നിട്ടുണ്ട്. കേരള പ്രദേശത്തെ ജീവിത പലമകളുടെ ആവിഷ്‌കാരങ്ങൾ, പറച്ചിലും പാട്ടുമായി, മൊഴിവഴക്ക പാരമ്പര്യമായി പകർന്നു വന്നിട്ടുണ്ട്. തമിഴകത്തിന്റെ ഭാഗമായിട്ടാണ് പ്രാചീന കാലത്ത് കേരളം നിലനിന്നത്. കേരള പ്രദേശത്തിന്റെ ചരിത്രവും സംസ്‌കാരവും പഴംതമിഴ് പാട്ടുകളിൽ (Classical Tamil Texts) പ്രതിപാദിക്കുന്നുണ്ട്. മഹാശില സ്മാരകങ്ങൾ(Megalithic Culture) ഉൾപ്പടെയുള്ള പുരാവസ്തു തെളിവുകൾ പ്രാചീന കേരളത്തിലെ ഭൗതിക സംസ്‌കൃതിയെയും ജീവിത രൂപങ്ങളേയും വ്യക്തമാക്കുന്നവയാണ്. നദീതടങ്ങളിൽ സ്ഥിര കൃഷിയും, പറമ്പ്-പുരയിട പ്രദേശങ്ങളിൽ ബഹുവിള കൃഷിയും ജനവാസവും വികസിച്ചു വന്നപ്പോൾ, കേരളത്തിലെ ഇടനാട് പ്രദേശത്ത് സാമൂഹിക ജീവിത ക്രമങ്ങൾ സങ്കീർണ്ണവും വ്യവസ്ഥാപിതമാകുകയും ചെയ്തു. ഇതിന്റെയും ഭാഗമായി കേരള പ്രദേശത്ത് വിവിധ അധികാര രൂപങ്ങൾ വളർന്നു വന്നു. അധികാര വ്യവസ്ഥയുടെ, വളർച്ചയുടെ ഭാഗമായി പലതരം വ്യവസ്ഥകൾ ചിട്ടപ്പെട്ടു. എഴുതി അടയാളപ്പെട്ട രേഖകളായി അധികാര വ്യവസ്ഥയുടെ അനുദിന പ്രയോഗങ്ങൾ വളർന്നു വരികയും ചെയ്തു. കല്ലുപാളികളിലും ചെമ്പുതകിടിലും എഴുതിയ ശാസനങ്ങൾ (inscriptions) ഈ വ്യവസ്ഥയുടെ ഭാഗമായി ഉണ്ടായി വന്നതാണ്. ഗ്രന്ഥവരി (palm leaf documents) രേഖകൾ അധികാര ബന്ധങ്ങൾ ക്രമപ്പെട്ടു വന്നതിന്റെ തെളിവാണ്. കേരളത്തിന്റെ മധ്യകാലങ്ങളിലെ ജീവിത പ്രവർത്തികളെയും സമ്പദ്ക്രമങ്ങളെയും അധികാര രൂപങ്ങളെയും സൂചിപ്പിക്കുന്നതോടൊപ്പം ആധുനിക കാലം വരെയുള്ള സാമൂഹിക സാംസ്‌കാരിക ജീവിതത്തെ ആവിഷ്‌ക്കരിക്കുന്ന പ്രധാനപ്പെട്ട തെളിവു രൂപങ്ങളാണ് ഗ്രന്ഥവരികൾ. നാട്ടു കോയ്മകളുടെയും, ക്ഷേത്ര ബ്രാഹ്‌മണ്യത്തിന്റെയും, നമ്പൂതിരി ജന്മിത്തത്തിന്റെയും, ചേര പെരുമാക്കന്മാരുടെയും, നാടുവാഴി കോവിലകങ്ങളുടെയും, പ്രാദേശിക രാജസ്ഥാനങ്ങളുടെയും വികാസപരിണാമങ്ങളുടെ നാൾവഴി ക്രമങ്ങളും അധികാര ബന്ധങ്ങളും വിവിധ പുരാരേഖകളിൽ വെളിപ്പെടുന്നു. കേരളത്തിന്റെ പ്രാചീന മധ്യകാല ചരിത്രത്തെ പഠിക്കാനുള്ള പ്രധാന തെളിവു രൂപങ്ങൾ കൂടിയാണിവ.

മലയാളിയെ രൂപപ്പെടുത്തിയ ചരിത്ര പ്രക്രിയകൾ

പ്രാചീന കാലം മുതൽ, ഇന്ത്യൻ മഹാസമുദ്ര വ്യവസ്ഥയും അറബിക്കടലും ഭൂഗോള വടക്കൻ രാജ്യങ്ങളുമായും ഭൂഗോള തെക്കൻ പ്രദേശങ്ങളുമായും കേരള പ്രദേശത്തെ ബന്ധിപ്പിക്കുന്ന മേഖലയായിരുന്നു. സമുദ്രവ്യവസ്ഥയും കടലും കടന്ന് കേരള തീരത്തെത്തിയവർ കേരളത്തെപ്പറ്റി വിവരിച്ച സഞ്ചാര കുറിപ്പുകൾ ലഭ്യമാണ്. ഗ്രീക്കുകാരും റോമക്കാരും പശ്ചിമേഷ്യക്കാരും ചൈനക്കാരും അറബികളും ഉൾപ്പടെ വിവിധ ഭൂഖണ്ഡങ്ങളിലുള്ള സഞ്ചാരികളുടെ വിവരണങ്ങൾ കേരളത്തെപ്പറ്റിയുള്ള പുറം കാഴ്ച്ചകളായി ലഭ്യമാണ്. ചരിത്ര പഠനത്തിനാവശ്യമായ തെളിവു രൂപങ്ങളാണിവ. യൂറോപ്യൻമാരുടെ ആഗമനം കേരളത്തിലെ ചരിത്ര പ്രക്രിയകളെയും ജീവിതക്രമങ്ങളെയും പരിവർത്തിപ്പിച്ച ഇടപാടായി മാറി. പാശ്ചാത്യലോകവുമായി കേരളത്തെ ബന്ധിപ്പിക്കുന്നതായിരുന്നു യുറോപ്യൻമാരുടെ കേരളവുമായുള്ള ബന്ധങ്ങൾ. കച്ചവട കമ്പനികൾ മുതൽ പാതിരി ഇടപാടുകൾ വരെ കേരളക്കരയെ പരിവർത്തിപ്പിച്ച പാശ്ചാത്യ ബന്ധങ്ങളിൽ പെടുന്നവയാണ്. ഇവ കേരളത്തിൽ സാമൂഹിക സാംസ്‌കാരിക ജീവിതത്തിലും സമ്പദ് ക്രമത്തിലും ഇടപെട്ട ഘടകങ്ങളായി പ്രവർത്തിച്ചു. അസംഖ്യം രേഖകൾ ഈ ബന്ധങ്ങളുടെ ശേഷിപ്പായി പുരാരേഖകളായി നിലവിലുണ്ട്. മലയാളിയുടെ ആധുനികവൽക്കരണ പ്രക്രിയയെ സ്വാധീനിച്ച സാംസ്‌കാരിക രൂപങ്ങളും ആശയ വ്യവസ്ഥയും ജീവിതക്രമവും ലോകവീക്ഷണവും സ്ഥാപന രൂപങ്ങളും ഇതിൽ പെടുന്നു. കേരളത്തിലെ തദ്ദേശിയ ജനജീവിത രൂപങ്ങൾ ഭാഷാ വിനിമയത്തിലും ആവിഷ്‌കാരത്തിലും കാണാവുന്നതാണ്. എഴുത്തു വിദ്യയിലും വിജ്ഞാന രീതികളിലും സാഹിത്യ രൂപങ്ങളിലും മൊഴിവഴക്കങ്ങളിലും വിവിധങ്ങളായ ആട്ടക്രമങ്ങളിലും സാംസ്‌കാരിക പലമകളിലും ജീവിത പ്രവർത്തികളിലും മലയാളി രൂപപ്പെട്ട ചരിത്ര പ്രക്രിയകൾ അടയാളപെട്ടിരിക്കുന്നു. ചരിത്ര പ്രക്രിയകളെ കണ്ടെടുക്കുന്ന തെളിവു രൂപങ്ങൾ ഇങ്ങനെ പലവിധമാണ്. മനുഷ്യർ ജീവിതം കൊണ്ടു രൂപപ്പെടുത്തിയ ഭൗതികവും മാനസികവുമായ എല്ലാവിധ അടയാളങ്ങളും ആവിഷ്‌ക്കാരങ്ങളും ഓർമ്മകളും ജീവിത പ്രവർത്തികളും ചരിത്രത്തിന്റെ അവശേഷിപ്പുകളാണ്. ചരിത്ര നിർമ്മിതിക്കാവശ്യമായ അസംസ്‌കൃത വസ്തുക്കളായിട്ടാണ് ചരിത്ര ശാസ്ത്രവും സാമൂഹ്യ ശാസ്ത്രവിജ്ഞാനവും ഇതിനെ പരിഗണിക്കുന്നത്.

കാഴ്ച്ചപ്പാടും നിലപാടും

കേരളത്തിന്റെ പ്രാചീന മധ്യകാലങ്ങളിലെ ചരിത്ര പ്രക്രിയകളെ മുൻനിർത്തി, സമൂഹ രൂപികരണം, അധികാര ബന്ധങ്ങൾ എന്നിവയെ സാമാന്യമായി അവതരിപ്പിക്കാനാണ് ഇവിടെ ശ്രമിച്ചിട്ടുള്ളത്. കേരളത്തിന്റെ ഭൂമിശാസ്ത്രപരമായ കിടപ്പും പാരിസ്ഥിതിക വ്യൂഹവും ജൈവീക ഘടകങ്ങളും ഇതിൽ പ്രാധാന്യമർഹിക്കുന്നു. കാടും കടലും നദീതടങ്ങളും ചതുപ്പു ഭൂമിയും കായൽ പ്രദേശങ്ങളും പറമ്പ് ഭൂമിയും വിഭവ ശേഖരണ പ്രക്രിയയെയും വിഭവ ഉൽപാദനത്തെയും സ്വാധീനിച്ച ഭൂപ്രദേശങ്ങളാണ്. അധ്വാന രൂപങ്ങളും സാങ്കേതിക വിദ്യകളും നിപുണതയും അറിവു രൂപങ്ങളും സ്വത്തുടമസ്ഥതയും അവകാശ ക്രമങ്ങളും രൂപപ്പെട്ട പ്രക്രിയ സങ്കീർണ്ണമാണ്. സാമൂഹിക ബന്ധങ്ങൾ അധികാര ബന്ധങ്ങളായി വളർന്നു വന്നപ്പോൾ, സാമൂഹിക പുറന്തള്ളൽ വ്യവസ്ഥാപിതമായ ചൂഷണരൂപമായി മാറി. ലിംഗഭേദരൂപങ്ങളും ജാതിക്രമങ്ങളും, ജാതി അടിമത്തവും വേർതിരിവും അസമത്ത വ്യവസ്ഥയുമായി വളർന്നു വന്നു. വ്യത്യസ്ത സാമൂഹിക വിഭാഗങ്ങൾ, ശ്രേണി വ്യവസ്ഥയിൽ വിവിധ സാമൂഹിക നിലകളിൽ സ്ഥാനപ്പെട്ടു. കോയ്മ സ്ഥാപിച്ച സാമൂഹിക വിഭാഗങ്ങളുടെ അധികാരത്തെ നിലനിർത്തുന്നതിനായി അധികാരവും അറിവു വ്യവസ്ഥയും ചിട്ടപ്പെട്ടു വന്നു. ചരിത്ര പ്രക്രിയയെ സമൂഹത്തിന്റെ കീഴ്ത്തട്ടിൽ നിന്നും ഉൾകൊള്ളൽ, ചരിത്ര വീക്ഷണത്തോടെ കാണാൻ ശ്രമിക്കുമ്പോൾ, ചരിത്രം അധികാരവും ആധിപത്യവും നിലനിർത്തിയവരുടെ വ്യവസ്ഥകളെ മുൻനിർത്തിയാണ് എഴുതിയിരിക്കുന്നത് എന്ന് മനസ്സിലാകും. ചരിത്രത്തിന്റെ തെളിവ് രൂപങ്ങളെ സമീപിക്കുന്നതും ചരിത്ര ഭൂതകാലത്തെ മനസ്സിലാക്കുന്ന കാഴ്ച്ചപ്പാടും ഇതേ നിലപാടിൽ നിന്ന് കാര്യമായി മാറിയിട്ടില്ല. ഇതു മൂലം ചരിത്ര വിജ്ഞാനം തന്നെ അധികാര ബന്ധങ്ങളെ സാധൂകരിക്കുന്ന ഒരു അധികാര വിജ്ഞാനമായി മാറിയിട്ടുണ്ട്. ഇത്തരത്തിലുള്ള ചരിത്ര പാഠങ്ങളെ കേരളത്തിന്റെ പ്രാചീന മധ്യകാല ചരിത്രത്തെ മുൻനിർത്തി സമീപിക്കാനാണ് ഇവിടെ ശ്രമിച്ചിട്ടുള്ളത്.

കേരളം: അതിരുകളും ആവാസ വ്യവസ്ഥയും

അറബികടലിനും പശ്ചിമഘട്ടങ്ങൾക്കും ഇടയിൽ സ്ഥിതി ചെയ്യുന്ന സവിശേഷമായ ഭൂപ്രകൃതിയുള്ള ഒരു പ്രദേശമാണ് കേരളം. കേരളത്തിന് ഭൂമിശാസ്ത്രപരമായ പല പ്രത്യേകതകളുമുണ്ട്. പാരിസ്ഥിതിക പ്രത്യേകതകളും സസ്യ-ജന്തു ജാലങ്ങളുടെ വൈവിധ്യങ്ങളും വിഭവ മേഖലയെന്ന നിലയിലുള്ള അനന്യതയും പശ്ചിമ ഘട്ട പ്രദേശങ്ങളെ വ്യത്യസ്തമാക്കുന്നു. മൺസൂൺ മഴക്കാറ്റുകളെ തടഞ്ഞ് തെക്ക് പടിഞ്ഞാറൻ കാലവർഷത്തെ സൃഷ്ടിക്കുന്നതിനാൽ ഈർപ്പ സാന്നിദ്ധ്യവും ജൈവ വൈവിധ്യവും വിഭവ ധാരാളിത്തവും നിലനിൽക്കുന്ന ഒരു പ്രദേശം കൂടിയാണ് പശ്ചിമഘട്ടം പ്രദേശങ്ങൾ. പശ്ചിമഘട്ടത്തിലെ ഇടതൂർന്നതും ഇല പൊഴിയുന്നതുമായ കാട് മേഖലയും നിബിഡ വനങ്ങളും ഈ പ്രദേശത്തെ ജൈവമേഖലയാക്കുന്നു.

കേരളത്തിലെ നദികൾ ഉൽഭവിക്കുന്നത് പശ്ചിമഘട്ട മല മേഖലകളിൽ നിന്നാണ്. ഈ നദികൾ പർവ്വതങ്ങളും കുന്നുകളും താഴ്‌വരകളും സമതലങ്ങളും താണ്ടി കായലുകളിലും, അല്ലെങ്കിൽ നേരിട്ട് കടലിലും പതിക്കുന്നു. പശ്ചിമഘട്ട വന മേഖല ഒരു ജൈവ പാരിസ്ഥിതിക വ്യൂഹവും വനവിഭവ പ്രദേശവുമായിട്ടാണ് ചരിത്ര ഭൂതകാലങ്ങളിൽ നിലനിന്നത്. പശ്ചിമഘട്ടത്തിലെ ചുരങ്ങളും വഴികളും തമിഴകവും മലനാടും തമ്മിൽ ബന്ധിപ്പിക്കുന്ന സാംസ്‌കാരിക ഇടനാഴികളായിട്ടായിരുന്നു ചരിത്ര ഭൂതകാലങ്ങളിൽ നിലനിന്നിട്ടുള്ളത്.

കാടും നാടും

ഭക്ഷ്യശേഖരണത്തിന്റെയും ഭക്ഷ്യ ഉൽപാദനത്തിന്റെയും അടിസ്ഥാനത്തിൽ പ്രാചീന കാലം മുതൽ കേരള പ്രദേശം കാടും നാടുമായി വേർതിരിഞ്ഞിരുന്നു. കേരളത്തിലെ ജീവന രൂപങ്ങളെയും ജൈവപാരിസ്ഥിതിക പ്രത്യേകതയെയും, കാടു പ്രദേശങ്ങളും നാടു പ്രദേശങ്ങളും പരസ്പരം സ്വാധീനിച്ചിട്ടുണ്ട്.

കാടും നാടും എന്ന വേർതിരിവിനോടൊപ്പം പറമ്പ്-പുരയിട പ്രദേശങ്ങളും, നീർനില കൃഷിയിടങ്ങളും, ചതുപ്പും കായൽ പ്രദേശങ്ങളും, കടൽ തീരവും, കേരളത്തിന്റെ ആവാസ വ്യവസ്ഥയെയും അതിജീവന രീതികളെയും നിർണ്ണയിച്ച ജീവന ഇടങ്ങളാണ്. കാട് മേഖലയായിരുന്ന പശ്ചിമഘട്ട വനമേഖല, പർവ്വത-കുന്ന് മല പ്രദേശങ്ങൾ ഉൾപ്പെടുന്ന കിഴക്കൻ മേഖലയാണ്. ഇവിടെ നിന്ന് കടലിലേക്കും, തിരിച്ച് കടൽ-കായൽ മേഖലയിൽ നിന്ന് കാട് മേഖലയിലേക്കുമുള്ള, വിഭവങ്ങളുടേയും മനുഷ്യരുടെയും സഞ്ചാരവും, ജീവിത രൂപങ്ങളുടെയും വിഭവങ്ങളുടേയും കൈമാറ്റവുമാണ് കേരളത്തിന്റെ പ്രാചീന ചരിത്ര ഭൂതകാലത്തിൽ നടന്ന പ്രധാനപ്പെട്ട ചരിത്ര പ്രക്രിയ.

പ്രാചീന കേരളത്തിലെ ജീവിത ഇടങ്ങൾ

കിഴക്ക് നിന്ന് നദികൾ ഒഴുക്കി കൊണ്ടുവരുന്ന ജൈവാംശങ്ങൾ പുഴയോരങ്ങളിൽ അടിഞ്ഞാണ് എക്കൽ നിറഞ്ഞ നദീതടങ്ങൾ രൂപപ്പെട്ടത്. എക്കൽ അടിഞ്ഞ പുഴയോര പ്രദേശങ്ങളിൽ നീർനില കൃഷിയിടങ്ങൾ വയലും പാടവുമായി വളർന്നു വന്നു. ഇടനാടിന്റെ പ്രധാന കാർഷിക പ്രദേശമായി ഈ നീർനില കൃഷി ഇടങ്ങൾ മാറി. ഇടനാടിന്റെ ഭാഗമായിട്ടാണ് ചെങ്കൽ മൺ പ്രദേശമായ പറമ്പ് ഭൂമി പ്രദേശം വികസിച്ചുവന്നത്. പറമ്പുകൾ വിവിധ തരത്തിലുള്ള വിളകൾ കൃഷി ചെയ്യുന്ന ബഹുവിള കാർഷിക പ്രദേശമാണ്. കാർഷിക സമൂഹങ്ങളുടെ പാർപ്പിടങ്ങളായി, പുരയിടങ്ങൾ ബഹു വിള പറമ്പ് ഭൂമികളിൽ രൂപപെട്ടു. പറമ്പ്-പുരയിട പ്രദേശം ഇടനാട്ടിലെ ബഹുവിള വിഭവ പ്രദേശമായിട്ടാണ് നിലനിന്നത്. കായൽ ചതുപ്പും ഉൾനാടൻ ജല മേഖലയും തീര പ്രദേശവും കടൽവ്യവസ്ഥയും വിവിധ ജീവിത പ്രക്രിയകളെ നിർമ്മിച്ച ഭൂപ്രദേശമാണ്. ഉപ്പു കുറുക്കലും മീൻ പിടിത്തവും കടൽ വിഭവങ്ങൾ ശേഖരിക്കലും ഉൾനാടൻ മത്സ്യ ബന്ധനവും ഉൾപ്പെടുന്ന ജീവിത പ്രക്രിയകളെ ആശ്രയിച്ചാണ് കായൽ-കടൽ പ്രദേശങ്ങളിലെ ജനജീവിതം നിലനിന്നത്. കേരളത്തിലെ പശ്ചിമഘട്ട കാട് മേഖലയും പടിഞ്ഞാറൻ കായൽ-കടൽ മേഖലകളും തമ്മിൽ കൈമാറ്റ ഇടപാടുകൾ വളർന്നു വന്നു. വനവിഭവങ്ങൾ കടൽ തീരത്തേയ്ക്കും, ഉണക്ക മത്സ്യവും കല്ലുപ്പും കാട് മേഖലയിലേക്കും കൈമാറി എത്തി. ഈ കൈമാറ്റ ബന്ധങ്ങളുടെ ഭാഗമായിട്ടാണ് ക്രമേണ ഈ രണ്ട് മേഖലകൾക്കും ഇടയിൽ നീർനില നെൽകൃഷി പ്രദേശവും പറമ്പുഭൂമികളും വളർന്നു വന്നത്. പ്രാചീന കാലം മുതൽ നീർനില നെൽകൃഷി ഇടങ്ങളും ബഹുവിള പറമ്പ് കൃഷി പ്രദേശവും സ്ഥിര കൃഷിയുടെ ഇടങ്ങളായി വികസിച്ചു വന്നു. ഇതു വഴി കാർഷിക ഉൽപാദന പ്രദേശമായി ഇടനാട് വളർന്നു വന്നു.

തുടരും…

Thanks for reading Historica! Subscribe for free to receive new posts and support my work.